ਸਿੰਗਾਪੁਰ ਸਰਕਾਰ ਨੇ ਪ੍ਰਧਾਨ ਮੰਤਰੀ ਲਾਰੈਂਸ ਵੋਂਗ ਸਮੇਤ ਮੰਤਰੀਆਂ ਅਤੇ ਹੋਰ ਉੱਚ ਅਹੁਦੇਦਾਰਾਂ ਦੀਆਂ ਤਨਖਾਹਾਂ ਵਿੱਚ ਵਾਧਾ ਕਰਨ ਦਾ ਐਲਾਨ ਕੀਤਾ ਹੈ। ਵੋਂਗ ਦੀ ਸਾਲਾਨਾ ਤਨਖਾਹ 2.2 ਮਿਲੀਅਨ ਸਿੰਗਾਪੁਰ ਡਾਲਰ ਤੋਂ ਵਧ ਕੇ 3.6 ਮਿਲੀਅਨ ਸਿੰਗਾਪੁਰ ਡਾਲਰ ਹੋ ਜਾਵੇਗੀ, ਜੋ 60 ਫ਼ੀਸਦੀ ਤੋਂ ਵੱਧ ਵਾਧਾ ਹੈ।
ਵੋਂਗ ਨੇ ਕਿਹਾ ਹੈ ਕਿ ਉਹ ਅਗਲੇ ਪੰਜ ਸਾਲਾਂ ਦੌਰਾਨ ਤਨਖਾਹ ਵਿੱਚ ਹੋਣ ਵਾਲਾ ਵਾਧੂ ਹਿੱਸਾ ਚੈਰਿਟੀ ਲਈ ਦਾਨ ਕਰਨਗੇ। ਉਨ੍ਹਾਂ ਮੁਤਾਬਕ ਉੱਚ ਤਨਖਾਹਾਂ ਦਾ ਮਕਸਦ ਸਮਰੱਥ ਅਤੇ ਤਜਰਬੇਕਾਰ ਲੋਕਾਂ ਨੂੰ ਰਾਜਨੀਤੀ ਵਿੱਚ ਆਉਣ ਲਈ ਉਤਸ਼ਾਹਿਤ ਕਰਨਾ ਹੈ।
ਸਰਕਾਰ ਦਾ ਤਰਕ ਹੈ ਕਿ ਮੁਕਾਬਲੇ ਵਾਲੀਆਂ ਤਨਖਾਹਾਂ ਰਾਹੀਂ ਬਿਹਤਰ ਟੈਲੇਂਟ ਨੂੰ ਸਰਕਾਰੀ ਅਹੁਦਿਆਂ ਵੱਲ ਆਕਰਸ਼ਿਤ ਕੀਤਾ ਜਾ ਸਕਦਾ ਹੈ ਅਤੇ ਭ੍ਰਿਸ਼ਟਾਚਾਰ ਦੇ ਖ਼ਤਰੇ ਨੂੰ ਵੀ ਘਟਾਇਆ ਜਾ ਸਕਦਾ ਹੈ।
ਹਾਲਾਂਕਿ, ਇਸ ਫ਼ੈਸਲੇ ਦੀ ਸਿੰਗਾਪੁਰ ਵਿੱਚ ਆਲੋਚਨਾ ਵੀ ਹੋ ਰਹੀ ਹੈ। ਲੋਕਾਂ ਵੱਲੋਂ ਨੌਕਰੀਆਂ ਦੀ ਸੁਰੱਖਿਆ, ਛਾਂਟੀਆਂ ਅਤੇ ਮਹਿੰਗਾਈ ਨੂੰ ਲੈ ਕੇ ਚਿੰਤਾਵਾਂ ਜਤਾਈਆਂ ਜਾ ਰਹੀਆਂ ਹਨ। ਸਿੰਗਾਪੁਰ ਵਿੱਚ ਔਸਤ ਮਾਸਿਕ ਆਮਦਨ ਲਗਭਗ 5,775 ਸਿੰਗਾਪੁਰ ਡਾਲਰ ਹੈ, ਜਿਸ ਦੇ ਮੁਕਾਬਲੇ ਮੰਤਰੀਆਂ ਦੀਆਂ ਤਨਖਾਹਾਂ ਕਾਫ਼ੀ ਜ਼ਿਆਦਾ ਹਨ।
ਨਵੀਂ ਯੋਜਨਾ ਤਹਿਤ ਮੰਤਰੀਆਂ ਦਾ ਮੁੱਢਲਾ ਤਨਖਾਹ ਪੈਕੇਜ ਵੀ ਵਧਾਇਆ ਜਾਵੇਗਾ ਅਤੇ ਕਾਰਗੁਜ਼ਾਰੀ ਦੇ ਆਧਾਰ ’ਤੇ ਇਹ ਹੋਰ ਵਧ ਸਕਦਾ ਹੈ। ਸਰਕਾਰ ਦੀ ਤਨਖਾਹ ਪ੍ਰਣਾਲੀ ਵਿੱਚ ਦੇਸ਼ ਦੀ GDP ਵਾਧਾ ਦਰ, ਬੇਰੁਜ਼ਗਾਰੀ ਅਤੇ ਆਮਦਨ ਵਾਧੇ ਵਰਗੇ ਆਰਥਿਕ ਸੂਚਕਾਂ ਨੂੰ ਵੀ ਧਿਆਨ ਵਿੱਚ ਰੱਖਿਆ ਜਾਂਦਾ ਹੈ।
ਵੋਂਗ ਪਹਿਲਾਂ ਹੀ ਦੁਨੀਆਂ ਦੇ ਸਭ ਤੋਂ ਵੱਧ ਤਨਖਾਹ ਲੈਣ ਵਾਲੇ ਸਰਕਾਰੀ ਨੇਤਾਵਾਂ ਵਿੱਚੋਂ ਇੱਕ ਹਨ। ਤੁਲਨਾ ਲਈ, ਅਮਰੀਕੀ ਰਾਸ਼ਟਰਪਤੀ ਦੀ ਸਾਲਾਨਾ ਤਨਖਾਹ 4 ਲੱਖ ਅਮਰੀਕੀ ਡਾਲਰ ਹੈ।
ਸਿੰਗਾਪੁਰ ਸਰਕਾਰ ਦਾ ਕਹਿਣਾ ਹੈ ਕਿ ਦੇਸ਼ ਨੂੰ ਚਲਾਉਣ ਲਈ ਸਭ ਤੋਂ ਕਾਬਲ ਲੋਕਾਂ ਨੂੰ ਆਕਰਸ਼ਿਤ ਕਰਨਾ ਜ਼ਰੂਰੀ ਹੈ, ਜਦਕਿ ਆਲੋਚਕਾਂ ਦਾ ਸਵਾਲ ਹੈ ਕਿ ਆਮ ਲੋਕਾਂ ਦੀ ਆਮਦਨ ਅਤੇ ਮਹਿੰਗਾਈ ਦੀਆਂ ਚੁਣੌਤੀਆਂ ਵਿਚਕਾਰ ਇੰਨਾ ਵੱਡਾ ਤਨਖਾਹ ਵਾਧਾ ਕਿੰਨਾ ਜਾਇਜ਼ ਹੈ।
#saddatvusa #singapore #pmsalary ##charity