🇺🇸 9/11 ਦੀ 25ਵੀਂ ਬਰਸੀ: ਪੈਂਟਾਗਨ ’ਤੇ ਲਹਿਰਾਇਆ ਗਿਆ ਅਮਰੀਕੀ ਝੰਡਾ !

ਅਮਰੀਕਾ ਵਿੱਚ 11 ਸਤੰਬਰ 2001 ਦੇ ਦਹਿਸ਼ਤਗਰਦ ਹਮਲਿਆਂ ਦੀ 25ਵੀਂ ਬਰਸੀ ਮੌਕੇ ਸ਼ੁੱਕਰਵਾਰ ਸਵੇਰੇ ਪੈਂਟਾਗਨ ਦੀ ਇਮਾਰਤ ’ਤੇ ਵਿਸ਼ਾਲ ਅਮਰੀਕੀ ਝੰਡਾ ਲਹਿਰਾਇਆ ਗਿਆ। ਇਹ ਝੰਡਾ ਉਸੇ ਥਾਂ ’ਤੇ ਲਹਿਰਾਇਆ ਗਿਆ ਜਿੱਥੇ 25 ਸਾਲ ਪਹਿਲਾਂ ਹਾਈਜੈਕ ਕੀਤਾ ਗਿਆ ਇੱਕ ਯਾਤਰੀ ਜਹਾਜ਼ ਆ ਕੇ ਟਕਰਾਇਆ ਸੀ।

9/11 ਦੇ ਹਮਲਿਆਂ ਦੌਰਾਨ ਲਗਭਗ 3,000 ਲੋਕਾਂ ਦੀ ਜਾਨ ਗਈ ਸੀ। ਇਨ੍ਹਾਂ ਵਿੱਚੋਂ 184 ਲੋਕਾਂ ਦੀ ਮੌਤ ਪੈਂਟਾਗਨ ’ਤੇ ਹੋਏ ਹਮਲੇ ਵਿੱਚ ਹੋਈ ਸੀ। ਵਰਜੀਨੀਆ ਦੇ ਆਰਲਿੰਗਟਨ ਸਥਿਤ ਅਮਰੀਕੀ ਰੱਖਿਆ ਵਿਭਾਗ ਦੇ ਮੁੱਖ ਦਫ਼ਤਰ ਨੂੰ ਇਸ ਹਮਲੇ ਵਿੱਚ ਭਾਰੀ ਨੁਕਸਾਨ ਪਹੁੰਚਿਆ ਸੀ।

25 ਸਾਲ ਬਾਅਦ ਵੀ 9/11 ਦੀਆਂ ਯਾਦਾਂ ਅਮਰੀਕੀ ਲੋਕਾਂ ਦੇ ਮਨਾਂ ਵਿੱਚ ਤਾਜ਼ਾ ਹਨ। ਪੈਂਟਾਗਨ ਵਿਖੇ ਹੋਣ ਵਾਲੇ ਸਮਾਗਮ ਵਿੱਚ ਆਗੂ ਅਤੇ ਪੀੜਤ ਪਰਿਵਾਰ ਹਮਲਿਆਂ ਵਿੱਚ ਮਾਰੇ ਗਏ ਲੋਕਾਂ ਨੂੰ ਸ਼ਰਧਾਂਜਲੀ ਦੇਣਗੇ।

ਉਸ ਸਮੇਂ ਪੈਂਟਾਗਨ ਤੋਂ ਘਟਨਾ ਦੀਆਂ ਕਈ ਯਾਦਗਾਰ ਤਸਵੀਰਾਂ ਖਿੱਚਣ ਵਾਲੇ ਫੋਟੋਗ੍ਰਾਫਰ ਬੌਬ ਪੁਗ ਨੇ ਕਿਹਾ ਕਿ 9/11 ਤੋਂ ਪਹਿਲਾਂ ਅਤੇ ਬਾਅਦ ਦੀ ਦੁਨੀਆ ਵਿੱਚ ਵੱਡਾ ਫਰਕ ਹੈ ਅਤੇ 25 ਸਾਲ ਬਾਅਦ ਵੀ ਅਮਰੀਕਾ ਉਸ ਦਿਨ ਦੇ ਪ੍ਰਭਾਵਾਂ ਨਾਲ ਜੀ ਰਿਹਾ ਹੈ।

ਇਸ ਦੌਰਾਨ ਨਿਊਯਾਰਕ ਦੇ ਗਰਾਊਂਡ ਜ਼ੀਰੋ ’ਤੇ ਵੀ ਹਜ਼ਾਰਾਂ ਮ੍ਰਿਤਕਾਂ ਨੂੰ ਯਾਦ ਕਰਨ ਲਈ ਸਮਾਗਮ ਕਰਵਾਇਆ ਜਾ ਰਿਹਾ ਹੈ। ਸਮਾਗਮ ਦੌਰਾਨ ਕਰੀਬ 3,000 ਮ੍ਰਿਤਕਾਂ ਦੇ ਨਾਮ ਪੜ੍ਹੇ ਜਾਣਗੇ। ਪੈਨਸਿਲਵੇਨੀਆ ਦੇ ਸ਼ੈਂਕਸਵਿਲ ਵਿੱਚ ਵੀ 9/11 ਪੀੜਤਾਂ ਦੀ ਯਾਦ ਵਿੱਚ ਸ਼ਰਧਾਂਜਲੀ ਸਮਾਗਮ ਹੋ ਰਹੇ ਹਨ।

#saddatvusa#america#Pentagon#911atacks#tributeshow