ਵਾਸ਼ਿੰਗਟਨ – ਅਮਰੀਕੀ ਵ੍ਹਾਈਟ ਹਾਊਸ ਵੱਲੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਉਭਾਰਨ ਵਾਲੇ ਸਰਕਾਰੀ ਫੰਡਾਂ ਨਾਲ ਚਲਾਏ ਜਾ ਰਹੇ ਇਸ਼ਤਿਹਾਰਾਂ ਦੀ ਲੜੀ ਵਿੱਚ ਇੱਕ ਹੋਰ ਨਵਾਂ ਇਸ਼ਤਿਹਾਰ ਸ਼ਾਮਲ ਕੀਤਾ ਗਿਆ ਹੈ। “Final Battle” ਨਾਮਕ ਇਹ 30 ਸਕਿੰਟ ਦਾ ਇਸ਼ਤਿਹਾਰ ਟਰੰਪ ਦੀ 2024 ਦੀ ਰਾਸ਼ਟਰਪਤੀ ਮੁਹਿੰਮ ਦੌਰਾਨ ਵਰਤੀ ਗਈ ਵੀਡੀਓ ਅਤੇ ਸਿਆਸੀ ਬਿਆਨਬਾਜ਼ੀ ਨਾਲ ਕਾਫ਼ੀ ਮਿਲਦਾ-ਜੁਲਦਾ ਹੈ।
ਇਸ਼ਤਿਹਾਰ ਵਿੱਚ ਟਰੰਪ ਨੂੰ ਇੱਕ ਹਾਲ ਵਿੱਚ ਤੁਰਦੇ ਹੋਏ ਦਿਖਾਇਆ ਗਿਆ ਹੈ ਅਤੇ ਉਨ੍ਹਾਂ ਦੀ ਆਵਾਜ਼ ਵਿੱਚ “ਡੀਪ ਸਟੇਟ”, “ਗਲੋਬਲਿਸਟ”, ਕਮਿਊਨਿਸਟ, ਮਾਰਕਸਵਾਦੀ ਅਤੇ ਫਾਸਿਸਟਾਂ ਵਿਰੁੱਧ ਸਖ਼ਤ ਬਿਆਨ ਸੁਣਾਈ ਦਿੰਦੇ ਹਨ। ਇਸ਼ਤਿਹਾਰ ਦੇ ਅੰਤ ਵਿੱਚ “Paid for by the U.S. Government” ਲਿਖਿਆ ਹੋਇਆ ਹੈ।
AdImpact ਮੁਤਾਬਕ ਇਸ ਇਸ਼ਤਿਹਾਰ ’ਤੇ ਹੁਣ ਤੱਕ ਲਗਭਗ 3 ਲੱਖ ਡਾਲਰ ਤੋਂ ਵੱਧ ਖਰਚ ਹੋ ਚੁੱਕੇ ਹਨ। ਇਹ ਇਸ਼ਤਿਹਾਰ “Saturday Night Live”, ਅਤੇ ਕਈ ਕਾਲਜ ਤੇ NFL ਫੁੱਟਬਾਲ ਖੇਡਾਂ ਦੌਰਾਨ ਪ੍ਰਸਾਰਿਤ ਹੋਇਆ।
ਵ੍ਹਾਈਟ ਹਾਊਸ ਇਨ੍ਹਾਂ ਇਸ਼ਤਿਹਾਰਾਂ ਨੂੰ Public Service Announcements ਦੱਸਦਾ ਹੈ ਅਤੇ ਕਹਿੰਦਾ ਹੈ ਕਿ ਇਹ ਚੋਣੀ ਮੁਹਿੰਮ ਦੇ ਇਸ਼ਤਿਹਾਰ ਨਹੀਂ ਹਨ। ਦੂਜੇ ਪਾਸੇ, ਡੈਮੋਕ੍ਰੈਟਿਕ ਆਗੂਆਂ ਦੇ ਨਾਲ ਕੁਝ ਰਿਪਬਲਿਕਨ ਆਗੂਆਂ ਨੇ ਵੀ ਟੈਕਸਦਾਤਿਆਂ ਦੇ ਪੈਸੇ ਨਾਲ ਅਜਿਹੇ ਇਸ਼ਤਿਹਾਰ ਚਲਾਉਣ ’ਤੇ ਸਵਾਲ ਉਠਾਏ ਹਨ।
ਅਮਰੀਕੀ ਸੰਘੀ ਕਾਨੂੰਨ ਸਰਕਾਰੀ ਫੰਡਾਂ ਦੀ ਵਰਤੋਂ ਗੈਰ-ਅਧਿਕਾਰਤ “publicity or propaganda” ਲਈ ਕਰਨ ’ਤੇ ਪਾਬੰਦੀ ਲਗਾਉਂਦਾ ਹੈ। ਇਸ ਲਈ ਇਨ੍ਹਾਂ ਇਸ਼ਤਿਹਾਰਾਂ ਨੂੰ ਲੈ ਕੇ ਸਰਕਾਰੀ ਪੈਸੇ ਦੀ ਵਰਤੋਂ ਅਤੇ ਕਾਨੂੰਨੀ ਹੱਦਾਂ ਬਾਰੇ ਚਰਚਾ ਤੇਜ਼ ਹੋ ਗਈ ਹੈ।