ਅਮਰੀਕੀ ਸਰਕਾਰ ਦੇ ਡਿਪਾਰਟਮੈਂਟ ਆਫ਼ ਹੋਮਲੈਂਡ ਸਿਕਿਉਰਿਟੀ (DHS) ਵੱਲੋਂ ਗੈਰ-ਲਾਇਸੈਂਸਸ਼ੁਦਾ ਕਮਰਸ਼ੀਅਲ ਡਰਾਈਵਰਾਂ ਖ਼ਿਲਾਫ਼ ਜਾਰੀ ਕੀਤੇ ਗਏ ਇੱਕ ਏਆਈ-ਜਨਰੇਟਿਡ ਪੋਸਟਰ ਨੂੰ ਲੈ ਕੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਪੋਸਟਰ ਵਿੱਚ ਇੱਕ ਭੂਰੇ ਰੰਗ ਦੇ ਵਿਅਕਤੀ ਨੂੰ ‘ਮਿਸਟਰ ਸਿੰਘ’ ਕਹਿ ਕੇ ਸੰਬੋਧਿਤ ਕੀਤਾ ਗਿਆ ਹੈ ਅਤੇ ਉਸ ਨੂੰ ਅਮਰੀਕਾ ਛੱਡਣ ਦੀ ਚੇਤਾਵਨੀ ਦਿੱਤੀ ਗਈ ਹੈ।
ਪੋਸਟਰ ’ਤੇ “America for Americans” ਅਤੇ “Self Deport or Find Out” ਵਰਗੇ ਸੰਦੇਸ਼ ਲਿਖੇ ਗਏ ਹਨ। ਇਸ ਵਿੱਚ ‘ਟ੍ਰਾਂਸਫਾਰਮਰਜ਼’ ਫਰੈਂਚਾਈਜ਼ ਦੇ ਕਿਰਦਾਰ ਮੇਗਾਟਰੋਨ ਨੂੰ ਵੀ ਦਿਖਾਇਆ ਗਿਆ ਹੈ। DHS ਨੇ ਇਸ ਮੁਹਿੰਮ ਨੂੰ ਅਣਲਾਇਸੈਂਸਸ਼ੁਦਾ ਕਮਰਸ਼ੀਅਲ ਡਰਾਈਵਰਾਂ ਖ਼ਿਲਾਫ਼ ਆਪਣੀ ਕਾਰਵਾਈ ਦਾ ਹਿੱਸਾ ਦੱਸਿਆ ਹੈ।
DHS ਵੱਲੋਂ ਇੱਕ ਹੋਰ ਪੋਸਟ ਵਿੱਚ ਕਿਹਾ ਗਿਆ ਕਿ ਜੇਕਰ ਕੋਈ ਵਿਅਕਤੀ ਅਮਰੀਕਾ ਵਿੱਚ ਦੁਸ਼ਮਣੀ ਭਰਿਆ ਇਰਾਦਾ ਰੱਖਦਾ ਹੈ ਤਾਂ ਸਰਕਾਰ ਆਪਣੀ ਰੱਖਿਆ ਕਰੇਗੀ ਅਤੇ ਅਮਰੀਕੀਵਾਦ ਤੇ ਦੇਸ਼ ਦੀ ਰੱਖਿਆ ਕਰੇਗੀ।
‘ਮਿਸਟਰ ਸਿੰਘ’ ਸ਼ਬਦ ’ਤੇ ਇਤਰਾਜ਼
ਪੋਸਟਰ ਵਿੱਚ ‘ਮਿਸਟਰ ਸਿੰਘ’ ਸ਼ਬਦ ਦੀ ਵਰਤੋਂ ਨੂੰ ਲੈ ਕੇ ਸਿੱਖ ਅਤੇ ਹੋਰ ਭਾਈਚਾਰਕ ਸੰਗਠਨਾਂ ਨੇ ਸਖ਼ਤ ਇਤਰਾਜ਼ ਜਤਾਇਆ ਹੈ। Hindu American Foundation ਅਤੇ Sikh Coalition ਸਮੇਤ ਕਈ ਸੰਗਠਨਾਂ ਨੇ ਇਸ ਨੂੰ ਸਿੱਖਾਂ ਦੀ ਪਛਾਣ ਨਾਲ ਜੋੜ ਕੇ ਕੀਤੀ ਗਈ ਗਲਤ ਅਤੇ ਪੱਖਪਾਤੀ ਪੇਸ਼ਕਾਰੀ ਕਰਾਰ ਦਿੱਤਾ।
Sikh Coalition ਨੇ ਕਿਹਾ ਕਿ 9/11 ਦੇ 25 ਸਾਲ ਬਾਅਦ ਵੀ ਸਿੱਖਾਂ ਨੂੰ ਉਨ੍ਹਾਂ ਦੀ ਦਿੱਖ ਦੇ ਆਧਾਰ ’ਤੇ ਪ੍ਰੋਫਾਈਲ ਕੀਤੇ ਜਾਣ ਦੀ ਚਿੰਤਾ ਕਾਇਮ ਹੈ। ਸੰਗਠਨ ਨੇ ਕਿਹਾ ਕਿ ਅਮਰੀਕਾ ਵਿੱਚ ਲੱਖਾਂ ਸਿੱਖ ‘ਸਿੰਘ’ ਉਪਨਾਮ ਰੱਖਦੇ ਹਨ ਅਤੇ ਇਸ ਤਰ੍ਹਾਂ ਦੀ ਸਰਕਾਰੀ ਮੁਹਿੰਮ ਵਿੱਚ ਇਸ ਨਾਮ ਦੀ ਵਰਤੋਂ ਚਿੰਤਾ ਦਾ ਵਿਸ਼ਾ ਹੈ।
ਮਿਸ਼ੀਗਨ ਦੇ ਡੈਮੋਕ੍ਰੇਟਿਕ ਆਗੂ ਰਣਜੀਵ ਸਿੰਘ ਪੁਰੀ ਨੇ ਵੀ ਪੋਸਟ ਦੀ ਆਲੋਚਨਾ ਕੀਤੀ। ਉਨ੍ਹਾਂ ਕਿਹਾ ਕਿ ‘ਸਿੰਘ’ ਕੋਈ ਮਜ਼ਾਕ ਜਾਂ ਪੰਚਲਾਈਨ ਨਹੀਂ, ਸਗੋਂ ਦੁਨੀਆ ਭਰ ਦੇ ਲੱਖਾਂ ਸਿੱਖਾਂ ਵੱਲੋਂ ਮਾਣ ਨਾਲ ਰੱਖਿਆ ਜਾਣ ਵਾਲਾ ਨਾਮ ਹੈ। ਉਨ੍ਹਾਂ ਮੁਤਾਬਕ ਕਿਸੇ ਸਰਕਾਰੀ ਏਜੰਸੀ ਵੱਲੋਂ ਨਾਮ, ਧਰਮ ਜਾਂ ਦਿੱਖ ਦੇ ਆਧਾਰ ’ਤੇ ਕਿਸੇ ਭਾਈਚਾਰੇ ਦਾ ਮਜ਼ਾਕ ਉਡਾਉਣਾ ਠੀਕ ਨਹੀਂ ਹੈ।
ਟਰੰਪ ਸਰਕਾਰ ਦੀ ਡਿਪੋਰਟੇਸ਼ਨ ਮੁਹਿੰਮ ਤੇਜ਼
ਇਹ ਵਿਵਾਦ ਅਜਿਹੇ ਸਮੇਂ ਸਾਹਮਣੇ ਆਇਆ ਹੈ ਜਦੋਂ ਰਾਸ਼ਟਰਪਤੀ ਡੌਨਲਡ ਟਰੰਪ ਦੀ ਸਰਕਾਰ ਵੱਲੋਂ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਖ਼ਿਲਾਫ਼ ਕਾਰਵਾਈ ਤੇਜ਼ ਕੀਤੀ ਗਈ ਹੈ।
ਭਾਰਤੀ ਅਤੇ ਪੰਜਾਬੀ ਲੋਕ ਵੀ ਪ੍ਰਭਾਵਿਤ
ਇਸ ਕਾਰਵਾਈ ਵਿੱਚ ਭਾਰਤੀ ਨਾਗਰਿਕ ਵੀ ਸ਼ਾਮਲ ਹਨ। ਭਾਰਤੀ ਵਿਦੇਸ਼ ਮੰਤਰਾਲੇ ਮੁਤਾਬਕ, ਇਸ ਸਾਲ ਜੁਲਾਈ ਤੱਕ 1,563 ਭਾਰਤੀ ਨਾਗਰਿਕਾਂ ਨੂੰ ਅਮਰੀਕਾ ਤੋਂ ਡਿਪੋਰਟ ਕੀਤਾ ਜਾ ਚੁੱਕਾ ਸੀ।
ਵਿਦੇਸ਼ ਮੰਤਰਾਲੇ ਵੱਲੋਂ ਦਿੱਤੇ ਅੰਕੜਿਆਂ ਅਨੁਸਾਰ 2021 ਵਿੱਚ 805, 2022 ਵਿੱਚ 862, 2023 ਵਿੱਚ 670 ਅਤੇ 2024 ਵਿੱਚ 1,368 ਭਾਰਤੀ ਡਿਪੋਰਟ ਕੀਤੇ ਗਏ ਸਨ। ਡਿਪੋਰਟ ਕੀਤੇ ਜਾ ਰਹੇ ਲੋਕਾਂ ਵਿੱਚ ਪੰਜਾਬ ਅਤੇ ਹਰਿਆਣਾ ਨਾਲ ਸਬੰਧਤ ਲੋਕ ਵੀ ਸ਼ਾਮਲ ਹਨ।
ਸਿਆਸੀ ਆਗੂਆਂ ਨੇ ਵੀ ਚੁੱਕਿਆ ਮੁੱਦਾ
ਟੀਐੱਮਸੀ ਆਗੂ ਮਹੂਆ ਮੋਇਤਰਾ ਨੇ ਵੀ DHS ਦੀ ਪੋਸਟ ਦੀ ਆਲੋਚਨਾ ਕਰਦਿਆਂ ਇਸ ਨੂੰ ਭਾਰਤੀ-ਪੰਜਾਬੀ ਭਾਈਚਾਰੇ ਨੂੰ ਨਿਸ਼ਾਨਾ ਬਣਾਉਣ ਵਾਲੀ ਪੇਸ਼ਕਾਰੀ ਦੱਸਿਆ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਇਹ ਮਾਮਲਾ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਕੋਲ ਚੁੱਕਣ ਦੀ ਅਪੀਲ ਕੀਤੀ।
ਭਾਜਪਾ ਆਗੂ ਆਰ.ਪੀ. ਸਿੰਘ ਨੇ ਵੀ ਇਤਰਾਜ਼ ਜਤਾਉਂਦਿਆਂ ਕਿਹਾ ਕਿ ਅਮਰੀਕਾ ਨੂੰ ਆਪਣੇ ਇਮੀਗ੍ਰੇਸ਼ਨ ਕਾਨੂੰਨ ਲਾਗੂ ਕਰਨ ਦਾ ਅਧਿਕਾਰ ਹੈ, ਪਰ ਕਿਸੇ ਧਰਮ, ਨਸਲ ਜਾਂ ਭਾਈਚਾਰੇ ਦੀ ਪਛਾਣ ਨੂੰ ਤਨਜ਼ ਜਾਂ ਰੂੜ੍ਹੀਵਾਦੀ ਚਿੱਤਰਣ ਲਈ ਵਰਤਣਾ ਉਚਿਤ ਨਹੀਂ।
ਇਸ ਤਰ੍ਹਾਂ, DHS ਦੀ ਇਮੀਗ੍ਰੇਸ਼ਨ ਮੁਹਿੰਮ ਦੇ ਨਾਲ-ਨਾਲ ‘ਮਿਸਟਰ ਸਿੰਘ’ ਵਾਲੇ ਪੋਸਟਰ ਨੇ ਸਿੱਖ ਪਛਾਣ, ਨਸਲੀ ਪ੍ਰੋਫਾਈਲਿੰਗ ਅਤੇ ਸਰਕਾਰੀ ਪ੍ਰਚਾਰ ਦੀ ਭਾਸ਼ਾ ਨੂੰ ਲੈ ਕੇ ਨਵੀਂ ਚਰਚਾ ਛੇੜ ਦਿੱਤੀ ਹੈ।
#saddatvusa #DonaldTrump #americangovernment #target #SikhComunity #DHS