ਵਾਸ਼ਿੰਗਟਨ – ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਆਪਣੇ ਨਿਊਯਾਰਕ ਹਸ਼ ਮਨੀ ਕੇਸ ਨੂੰ ਫੈਡਰਲ ਅਦਾਲਤ ਵਿੱਚ ਲਿਜਾਣ ਦੀ ਕੋਸ਼ਿਸ਼ ਵਿੱਚ ਇੱਕ ਹੋਰ ਵੱਡਾ ਝਟਕਾ ਲੱਗਾ ਹੈ। ਇੱਕ ਅਮਰੀਕੀ ਫੈਡਰਲ ਜੱਜ ਨੇ ਸ਼ੁੱਕਰਵਾਰ ਨੂੰ ਟਰੰਪ ਦੇ ਕੇਸ ਨੂੰ ਫੈਡਰਲ ਕੋਰਟ ਵਿੱਚ ਤਬਦੀਲ ਕਰਨ ਦੀ ਨਵੀਂ ਕੋਸ਼ਿਸ਼ ਰੱਦ ਕਰ ਦਿੱਤੀ।
ਯੂਐਸ ਡਿਸਟ੍ਰਿਕਟ ਜੱਜ ਐਲਵਿਨ ਹੈਲਰਸਟਾਈਨ ਨੇ ਕਿਹਾ ਕਿ ਟਰੰਪ ਵੱਲੋਂ ਦਿੱਤੇ ਗਏ ਕਾਰਨ ਨਾ ਤਾਂ ਨਵੇਂ ਹਨ ਅਤੇ ਨਾ ਹੀ ਕਾਨੂੰਨੀ ਤੌਰ ’ਤੇ ਕੇਸ ਨੂੰ ਸਟੇਟ ਕੋਰਟ ਤੋਂ ਫੈਡਰਲ ਕੋਰਟ ਵਿੱਚ ਲਿਜਾਣ ਲਈ ਕਾਫ਼ੀ ਹਨ। ਜੱਜ ਨੇ ਕਿਹਾ ਕਿ ਟਰੰਪ ਇਹ ਸਾਬਤ ਕਰਨ ਵਿੱਚ ਅਸਫਲ ਰਹੇ ਕਿ ਕੇਸ ਤਬਦੀਲ ਕਰਨ ਲਈ ਕੋਈ ਠੋਸ ਆਧਾਰ ਮੌਜੂਦ ਹੈ।
ਟਰੰਪ ਨੂੰ ਮਈ 2024 ਵਿੱਚ 34 ਅਪਰਾਧਿਕ ਮਾਮਲਿਆਂ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ ਸੀ। ਇਹ ਮਾਮਲੇ 2016 ਦੀ ਰਾਸ਼ਟਰਪਤੀ ਚੋਣ ਤੋਂ ਪਹਿਲਾਂ ਐਡਲਟ ਫ਼ਿਲਮ ਅਦਾਕਾਰਾ ਸਟੌਰਮੀ ਡੇਨੀਅਲਜ਼ ਨੂੰ ਦਿੱਤੇ ਗਏ 1.30 ਲੱਖ ਡਾਲਰ ਦੇ ਭੁਗਤਾਨ ਨਾਲ ਜੁੜੇ ਹੋਏ ਸਨ।
ਟਰੰਪ ਦੇ ਉਸ ਸਮੇਂ ਦੇ ਵਕੀਲ ਮਾਈਕਲ ਕੋਹੇਨ ਨੇ ਡੇਨੀਅਲਜ਼ ਨੂੰ ਇਹ ਰਕਮ ਦਿੱਤੀ ਸੀ। ਡੇਨੀਅਲਜ਼ ਦਾ ਦਾਅਵਾ ਸੀ ਕਿ ਇਹ ਪੈਸੇ ਉਸ ਨੂੰ ਟਰੰਪ ਨਾਲ ਕਥਿਤ ਸਬੰਧ ਬਾਰੇ ਚੁੱਪ ਰਹਿਣ ਲਈ ਦਿੱਤੇ ਗਏ ਸਨ। ਟਰੰਪ ਨੇ ਇਸ ਦਾਅਵੇ ਤੋਂ ਇਨਕਾਰ ਕੀਤਾ ਹੈ।
ਇਸ ਮਾਮਲੇ ਵਿੱਚ ਮੁੱਖ ਮੁੱਦਾ ਪੈਸੇ ਦੇਣ ਦੀ ਕਾਨੂੰਨੀਤਾ ਨਹੀਂ, ਸਗੋਂ ਟਰੰਪ ਵੱਲੋਂ ਕੋਹੇਨ ਨੂੰ ਕੀਤੀਆਂ ਗਈਆਂ ਵਾਪਸੀ ਦੀਆਂ ਅਦਾਇਗੀਆਂ ਨੂੰ ਆਪਣੇ ਕਾਰੋਬਾਰੀ ਰਿਕਾਰਡਾਂ ਵਿੱਚ ਕਿਵੇਂ ਦਰਜ ਕੀਤਾ ਗਿਆ ਸੀ। ਸਰਕਾਰੀ ਵਕੀਲਾਂ ਨੇ ਦੋਸ਼ ਲਗਾਇਆ ਸੀ ਕਿ ਇਨ੍ਹਾਂ ਅਦਾਇਗੀਆਂ ਨੂੰ ਗਲਤ ਤਰੀਕੇ ਨਾਲ ਕਾਨੂੰਨੀ ਖਰਚਿਆਂ ਵਜੋਂ ਦਰਜ ਕੀਤਾ ਗਿਆ।
ਰਾਸ਼ਟਰਪਤੀ ਛੋਟ ਦਾ ਦਿੱਤਾ ਸੀ ਹਵਾਲਾ
ਟਰੰਪ ਨੇ ਆਪਣੀ ਸਜ਼ਾ ਅਤੇ ਦੋਸ਼ੀ ਠਹਿਰਾਏ ਜਾਣ ਨੂੰ ਚੁਣੌਤੀ ਦਿੰਦਿਆਂ ਅਮਰੀਕੀ ਸੁਪਰੀਮ ਕੋਰਟ ਦੇ 2024 ਦੇ ਉਸ ਫੈਸਲੇ ਦਾ ਹਵਾਲਾ ਦਿੱਤਾ, ਜਿਸ ਵਿੱਚ ਰਾਸ਼ਟਰਪਤੀਆਂ ਨੂੰ ਉਨ੍ਹਾਂ ਦੇ ਸਰਕਾਰੀ ਕੰਮਾਂ ਲਈ ਕੁਝ ਹੱਦ ਤੱਕ ਕਾਨੂੰਨੀ ਛੋਟ ਦਿੱਤੀ ਗਈ ਸੀ।
ਟਰੰਪ ਦਾ ਤਰਕ ਸੀ ਕਿ ਮੁਕੱਦਮੇ ਦੌਰਾਨ ਉਨ੍ਹਾਂ ਦੇ ਰਾਸ਼ਟਰਪਤੀ ਕਾਰਜਕਾਲ ਨਾਲ ਸਬੰਧਤ ਸਬੂਤ ਅਤੇ ਗਵਾਹੀਆਂ ਪੇਸ਼ ਕੀਤੀਆਂ ਗਈਆਂ, ਇਸ ਲਈ ਉਨ੍ਹਾਂ ਦੀ ਸਜ਼ਾ ’ਤੇ ਮੁੜ ਵਿਚਾਰ ਹੋਣਾ ਚਾਹੀਦਾ ਹੈ। ਹਾਲਾਂਕਿ ਜੱਜ ਹੈਲਰਸਟਾਈਨ ਨੇ ਕਿਹਾ ਕਿ ਹਸ਼ ਮਨੀ ਕੇਸ ਨਾਲ ਜੁੜਿਆ ਮੁੱਖ ਵਿਹਾਰ ਟਰੰਪ ਦੀ ਨਿੱਜੀ ਹੈਸੀਅਤ ਵਿੱਚ ਕੀਤਾ ਗਿਆ ਸੀ, ਨਾ ਕਿ ਰਾਸ਼ਟਰਪਤੀ ਵਜੋਂ।
ਦੋਸ਼ੀ ਕਰਾਰ, ਪਰ ਜੇਲ੍ਹ ਨਹੀਂ
10 ਜਨਵਰੀ 2025 ਨੂੰ ਜੱਜ ਜੁਆਨ ਮਰਚਨ ਨੇ ਟਰੰਪ ਨੂੰ unconditional discharge ਦੀ ਸਜ਼ਾ ਸੁਣਾਈ। ਇਸ ਤਹਿਤ ਉਨ੍ਹਾਂ ਨੂੰ ਨਾ ਜੇਲ੍ਹ ਦੀ ਸਜ਼ਾ ਹੋਈ, ਨਾ ਜੁਰਮਾਨਾ ਅਤੇ ਨਾ ਹੀ ਪ੍ਰੋਬੇਸ਼ਨ, ਪਰ 34 ਅਪਰਾਧਿਕ ਦੋਸ਼ਾਂ ਦੀ ਦੋਸ਼ਸਿੱਧੀ ਉਨ੍ਹਾਂ ਦੇ ਰਿਕਾਰਡ ’ਤੇ ਕਾਇਮ ਰਹੀ।
ਟਰੰਪ ਇਸ ਦੋਸ਼ਸਿੱਧੀ ਨੂੰ ਨਿਊਯਾਰਕ ਦੀ ਸਟੇਟ ਅਪੀਲ ਕੋਰਟ ਵਿੱਚ ਵੀ ਚੁਣੌਤੀ ਦੇ ਰਹੇ ਹਨ। ਨਿਊਯਾਰਕ ਦਾ ਹਸ਼ ਮਨੀ ਕੇਸ ਉਨ੍ਹਾਂ ਖ਼ਿਲਾਫ਼ ਚੱਲੇ ਚਾਰ ਅਪਰਾਧਿਕ ਮਾਮਲਿਆਂ ਵਿੱਚੋਂ ਇਕਲੌਤਾ ਮਾਮਲਾ ਸੀ, ਜੋ ਮੁਕੱਦਮੇ ਤੱਕ ਪਹੁੰਚਿਆ। ਟਰੰਪ ਨੇ ਸਾਰੇ ਮਾਮਲਿਆਂ ਵਿੱਚ ਆਪਣਾ ਕਸੂਰ ਮੰਨਣ ਤੋਂ ਇਨਕਾਰ ਕੀਤਾ ਹੈ।
#DonaldTrump #LatestNews #Washington #saddatvusa