ਡੌਨਲਡ ਟਰੰਪ ਦੀ ਮੁੜ ਚੋਣ ਤੋਂ ਬਾਅਦ ਕਈ ਕੈਨੇਡੀਅਨਾਂ ਨੇ ਅਮਰੀਕਾ ਦੀ ਯਾਤਰਾ ਦਾ ਬਾਈਕਾਟ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਟੈਰਿਫ਼ਾਂ, ਕੈਨੇਡਾ ਨੂੰ “51ਵਾਂ ਸੂਬਾ” ਕਹਿਣ ਵਾਲੀਆਂ ਟਿੱਪਣੀਆਂ ਅਤੇ ਦੋਵਾਂ ਦੇਸ਼ਾਂ ਦੇ ਰਿਸ਼ਤਿਆਂ ਵਿੱਚ ਆਏ ਤਣਾਅ ਕਾਰਨ ਹਜ਼ਾਰਾਂ ਲੋਕਾਂ ਨੇ ਆਪਣੀਆਂ ਅਮਰੀਕਾ ਵਾਲੀਆਂ ਛੁੱਟੀਆਂ ਰੱਦ ਕਰਕੇ ਆਪਣੇ ਹੀ ਦੇਸ਼ ਜਾਂ ਹੋਰ ਦੇਸ਼ਾਂ ਦਾ ਰੁਖ ਕਰ ਲਿਆ।
ਓਨਟਾਰੀਓ ਦੇ ਰਹਿਣ ਵਾਲੇ ਕੈਂਟ ਟਰਸਕੌਟ ਨੇ ਟੈਕਸਸ ਵਿੱਚ ਸਪੇਸਐਕਸ ਦਾ ਸਟਾਰਸ਼ਿਪ ਲਾਂਚ ਦੇਖਣ ਦੀ ਯੋਜਨਾ ਰੱਦ ਕਰਕੇ ਨੋਵਾ ਸਕੋਸ਼ੀਆ ਅਤੇ ਪ੍ਰਿੰਸ ਐਡਵਰਡ ਆਈਲੈਂਡ ਵਿੱਚ ਛੁੱਟੀਆਂ ਮਨਾਈਆਂ। ਉਨ੍ਹਾਂ ਕਿਹਾ ਕਿ ਹੁਣ ਅਮਰੀਕਾ ਜਾਣ ਬਾਰੇ ਸੋਚਣਾ ਵੀ ਔਖਾ ਲੱਗਦਾ ਹੈ।
ਓਟਾਵਾ ਦੀ ਲਿੰਡਾ ਰੂਸੋ ਅਤੇ ਉਨ੍ਹਾਂ ਦੇ ਪਤੀ ਨੇ ਵੀ ਨਿਊਯਾਰਕ ਤੋਂ ਪਨਾਮਾ ਨਹਿਰ ਵਾਲਾ ਕਰੂਜ਼ ਰੱਦ ਕਰਕੇ ਯੂਰਪ ਦੀ ਯਾਤਰਾ ਚੁਣੀ। ਇਸੇ ਤਰ੍ਹਾਂ ਵੈਨਕੂਵਰ ਦੇ ਨਿਕ ਸਮਿਥ ਨੇ ਕੈਲੀਫੋਰਨੀਆ ਦੀ ਥਾਂ ਮੋਰੱਕੋ ਦੀ ਯਾਤਰਾ ਕੀਤੀ, ਜਦਕਿ ਬ੍ਰਿਟਿਸ਼ ਕੋਲੰਬੀਆ ਦੀ ਕ੍ਰਿਸਟੀ ਮਿਚੇਲ ਨੇ ਲਾਸ ਵੇਗਾਸ ਜਾਣ ਦੀ ਬਜਾਏ ਸਪੇਨ ਦੇ ਮਸ਼ਹੂਰ ਕੈਮੀਨੋ ਫਰਾਂਸੇ ਰਸਤੇ ‘ਤੇ 790 ਕਿਲੋਮੀਟਰ ਦੀ ਪੈਦਲ ਯਾਤਰਾ ਪੂਰੀ ਕੀਤੀ।
ਅੰਕੜਿਆਂ ਮੁਤਾਬਕ, 2024 ਦੇ ਮੁਕਾਬਲੇ ਅਪ੍ਰੈਲ ਮਹੀਨੇ ਵਿੱਚ ਕੈਨੇਡੀਅਨਾਂ ਦੀਆਂ ਅਮਰੀਕਾ ਯਾਤਰਾਵਾਂ ਵਿੱਚ ਲਗਭਗ 8 ਲੱਖ ਦੀ ਕਮੀ ਦਰਜ ਕੀਤੀ ਗਈ। ਇਸ ਬਾਈਕਾਟ ਕਾਰਨ ਅਮਰੀਕਾ ਨੂੰ ਕਰੀਬ 3.3 ਅਰਬ ਕੈਨੇਡੀਅਨ ਡਾਲਰ ਦੀ ਸੈਰ-ਸਪਾਟਾ ਆਮਦਨ ਦਾ ਨੁਕਸਾਨ ਹੋਇਆ ਹੈ।
ਇਸ ਘਾਟ ਨੂੰ ਦੇਖਦਿਆਂ ਨਿਊਯਾਰਕ ਸਿਟੀ ਸਮੇਤ ਕਈ ਅਮਰੀਕੀ ਸ਼ਹਿਰਾਂ ਨੇ ਕੈਨੇਡੀਅਨ ਸੈਲਾਨੀਆਂ ਨੂੰ ਵਾਪਸ ਖਿੱਚਣ ਲਈ ਹੋਟਲਾਂ ਅਤੇ ਬ੍ਰੌਡਵੇ ਟਿਕਟਾਂ ‘ਤੇ 30 ਫ਼ੀਸਦੀ ਤੱਕ ਛੋਟ ਵਰਗੀਆਂ ਖ਼ਾਸ ਪੇਸ਼ਕਸ਼ਾਂ ਸ਼ੁਰੂ ਕੀਤੀਆਂ ਹਨ।
ਕਈ ਕੈਨੇਡੀਅਨਾਂ ਦਾ ਕਹਿਣਾ ਹੈ ਕਿ ਸਿਰਫ਼ ਰਾਸ਼ਟਰਪਤੀ ਬਦਲਣ ਨਾਲ ਗੱਲ ਨਹੀਂ ਬਣੇਗੀ। ਉਨ੍ਹਾਂ ਦੇ ਮੁਤਾਬਕ, ਜਦੋਂ ਤੱਕ ਕੈਨੇਡਾ ਅਤੇ ਅਮਰੀਕਾ ਦੇ ਰਿਸ਼ਤਿਆਂ ਵਿੱਚ ਭਰੋਸਾ ਅਤੇ ਦੋਸਤਾਨਾ ਮਾਹੌਲ ਮੁੜ ਕਾਇਮ ਨਹੀਂ ਹੁੰਦਾ, ਉਹ ਅਮਰੀਕਾ ਦੀ ਯਾਤਰਾ ਤੋਂ ਦੂਰ ਹੀ ਰਹਿਣਗੇ।