ਅਮਰੀਕਾ ਦੇ ਯੂਟਾ ਸੂਬੇ ਵਿੱਚ ਇੱਕ ਮਹਿਲਾ ਦੇ ਕਤਲ ਦੇ ਮਾਮਲੇ ਵਿੱਚ ਮੌਤ ਦੀ ਸਜ਼ਾ ਸੁਣਾਏ ਜਾਣ ਤੋਂ ਬਾਅਦ 41 ਸਾਲ ਤੱਕ ਜੇਲ੍ਹ ਵਿੱਚ ਰਹੇ ਡਗਲਸ ਸਟੀਓਰਟ ਕਾਰਟਰ ਨੂੰ ਹੁਣ ਜ਼ਮਾਨਤ ’ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ। ਕਾਰਟਰ, ਜੋ ਹੁਣ 71 ਸਾਲ ਦੇ ਹਨ, ਨੂੰ 1985 ਵਿੱਚ ਈਵਾ ਓਲੇਸਨ ਦੇ ਕਤਲ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ। ਉਨ੍ਹਾਂ ਨੇ ਹਮੇਸ਼ਾ ਆਪਣੇ ਆਪ ਨੂੰ ਬੇਗੁਨਾਹ ਦੱਸਿਆ ਅਤੇ ਕਿਹਾ ਕਿ ਪੁਲਿਸ ਨੇ ਉਨ੍ਹਾਂ ਤੋਂ ਜ਼ਬਰਦਸਤੀ ਗੁਨਾਹ ਕਬੂਲ ਕਰਵਾਇਆ ਸੀ।
ਮਾਮਲੇ ਵਿੱਚ ਨਵੇਂ ਸਿਰੇ ਤੋਂ ਕੀਤੀ ਗਈ DNA ਜਾਂਚ ਨੇ ਅਹਿਮ ਮੋੜ ਲਿਆਂਦਾ ਹੈ। ਸਰਕਾਰੀ ਵਕੀਲਾਂ ਮੁਤਾਬਕ ਦਰਵਾਜ਼ੇ ਦੇ ਹੈਂਡਲ ’ਤੇ ਮਿਲੇ ਖੂਨ ਅਤੇ ਚਾਕੂ ਦੇ ਹੈਂਡਲ ਤੋਂ ਮਿਲੇ ਜੈਨੇਟਿਕ ਮਟੀਰੀਅਲ ਨਾਲ ਕਾਰਟਰ ਦਾ DNA ਮੇਲ ਨਹੀਂ ਖਾਂਦਾ। ਇਸ ਕਾਰਨ ਉਨ੍ਹਾਂ ਖ਼ਿਲਾਫ਼ ਮਾਮਲੇ ਦੇ ਸਬੂਤਾਂ ’ਤੇ ਮੁੜ ਸਵਾਲ ਖੜ੍ਹੇ ਹੋਏ ਹਨ।
ਫਰਵਰੀ 1985 ਵਿੱਚ ਈਵਾ ਓਲੇਸਨ ਦੀ ਯੂਟਾ ਦੇ ਪ੍ਰੋਵੋ ਸਥਿਤ ਘਰ ਵਿੱਚ ਕਈ ਵਾਰ ਚਾਕੂ ਮਾਰ ਕੇ ਅਤੇ ਸਿਰ ਦੇ ਪਿਛਲੇ ਹਿੱਸੇ ਵਿੱਚ ਗੋਲੀ ਮਾਰ ਕੇ ਹੱਤਿਆ ਕੀਤੀ ਗਈ ਸੀ। ਕਾਰਟਰ ਨੂੰ ਉਸ ਸਮੇਂ ਗ੍ਰਿਫ਼ਤਾਰ ਕੀਤਾ ਗਿਆ ਜਦੋਂ ਉਹ ਯੂਟਾ ਤੋਂ ਨਿਕਲ ਕੇ ਟੈਨੇਸੀ ਦੇ ਨੈਸ਼ਵਿਲ ਵਿੱਚ ਮਿਲੇ ਸਨ। ਅਦਾਲਤ ਵਿੱਚ ਉਨ੍ਹਾਂ ਖ਼ਿਲਾਫ਼ ਮੁੱਖ ਸਬੂਤ ਉਨ੍ਹਾਂ ਦਾ ਕਥਿਤ ਕਬੂਲਨਾਮਾ ਅਤੇ ਦੋ ਗਵਾਹਾਂ ਦੀ ਗਵਾਹੀ ਸੀ।
ਬਾਅਦ ਵਿੱਚ ਦੋਵੇਂ ਗਵਾਹਾਂ ਨੇ ਆਪਣੇ ਬਿਆਨਾਂ ਤੋਂ ਮੁੱਕਰਦਿਆਂ ਦਾਅਵਾ ਕੀਤਾ ਕਿ ਪੁਲਿਸ ਨੇ ਉਨ੍ਹਾਂ ’ਤੇ ਦਬਾਅ ਪਾਇਆ, ਪੈਸੇ ਅਤੇ ਤੋਹਫ਼ੇ ਦਿੱਤੇ ਅਤੇ ਕਾਰਟਰ ਖ਼ਿਲਾਫ਼ ਗਵਾਹੀ ਦੇਣ ਲਈ ਕਿਹਾ। ਇਸ ਤੋਂ ਬਾਅਦ ਯੂਟਾ ਦੀ ਸੁਪਰੀਮ ਕੋਰਟ ਨੇ ਜਾਂਚ ਵਿੱਚ ਹੋਈਆਂ ਕਥਿਤ ਗੜਬੜੀਆਂ ਦਾ ਹਵਾਲਾ ਦਿੰਦਿਆਂ ਨਵੇਂ ਸਿਰੇ ਤੋਂ ਸੁਣਵਾਈ ਦਾ ਹੁਕਮ ਦਿੱਤਾ।
ਸੋਮਵਾਰ ਨੂੰ ਜੱਜ ਨੇ ਪੀੜਤ ਪਰਿਵਾਰ ਦੇ ਇਤਰਾਜ਼ਾਂ ਦੇ ਬਾਵਜੂਦ ਕਾਰਟਰ ਨੂੰ ਜ਼ਮਾਨਤ ਦੇ ਦਿੱਤੀ। ਜ਼ਮਾਨਤ ਦੌਰਾਨ ਉਨ੍ਹਾਂ ਨੂੰ GPS ਮਾਨੀਟਰ ਪਹਿਨਣਾ ਪਵੇਗਾ। ਪੀੜਤ ਪਰਿਵਾਰ ਨੇ ਕਿਹਾ ਕਿ ਨਵੇਂ DNA ਨਤੀਜਿਆਂ ਦੇ ਬਾਵਜੂਦ ਉਨ੍ਹਾਂ ਨੂੰ ਕਾਰਟਰ ਦੀ ਰਿਹਾਈ ਬਾਰੇ ਗੰਭੀਰ ਚਿੰਤਾ ਹੈ।
ਦੂਜੇ ਪਾਸੇ, ਕਾਰਟਰ ਦੇ ਵਕੀਲ ਨੀਲ ਹੈਮਿਲਟਨ ਨੇ ਕੇਸ ਨੂੰ ਖ਼ਤਮ ਕਰਨ ਦੀ ਮੰਗ ਕੀਤੀ ਹੈ। ਮਾਮਲੇ ਵਿੱਚ ਹੁਣ ਨਵੇਂ ਸਬੂਤਾਂ ਅਤੇ ਪਿਛਲੀ ਜਾਂਚ ਨਾਲ ਜੁੜੇ ਸਵਾਲਾਂ ਦੇ ਆਧਾਰ ’ਤੇ ਅਗਲੀ ਕਾਨੂੰਨੀ ਕਾਰਵਾਈ ਹੋਣੀ ਹੈ।
#america #yuta #NewsUpdate #saddatvusa #DNA