ਫੋਰਟ ਮੈਕਮਰੇ – ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਪੱਛਮੀ ਤੱਟ ਤੱਕ ਬਣਨ ਵਾਲੀ ਨਵੀਂ ਕੱਚੇ ਤੇਲ ਦੀ ਪਾਈਪਲਾਈਨ ਦੀ ਮਨਜ਼ੂਰੀ ਪ੍ਰਕਿਰਿਆ ਤੇਜ਼ ਕਰਨ ਦਾ ਐਲਾਨ ਕੀਤਾ ਹੈ। ਸਰਕਾਰ ਮੁਤਾਬਕ ਇਹ ਪ੍ਰਾਜੈਕਟ ਕੈਨੇਡਾ ਦੀ ਅਰਥਵਿਵਸਥਾ ਨੂੰ ਮਜ਼ਬੂਤ ਕਰਨ ਅਤੇ ਅਮਰੀਕਾ ’ਤੇ ਊਰਜਾ ਨਿਰਭਰਤਾ ਘਟਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾ ਸਕਦਾ ਹੈ।
ਕਾਰਨੀ ਨੇ ਐਲਾਨ ਕੀਤਾ ਕਿ ‘Pacific Link’ ਪਾਈਪਲਾਈਨ ਨੂੰ ਕੌਮੀ ਮਹੱਤਤਾ ਵਾਲਾ ਪ੍ਰਾਜੈਕਟ ਮੰਨਿਆ ਜਾਵੇਗਾ। ਇਸ ਤਹਿਤ ਇਸ ਦੀ ਸਮੀਖਿਆ ਲਈ ਇੱਕ ਸਿੰਗਲ ਫੈਡਰਲ ਰੈਗੂਲੇਟਰੀ ਪ੍ਰਕਿਰਿਆ ਅਪਣਾਈ ਜਾਵੇਗੀ ਅਤੇ ਸਰਕਾਰ ਦਾ ਟੀਚਾ 1 ਸਤੰਬਰ 2027 ਤੱਕ ਪ੍ਰਕਿਰਿਆ ਪੂਰੀ ਕਰਨ ਦਾ ਹੈ।
ਪ੍ਰਸਤਾਵਿਤ ਪਾਈਪਲਾਈਨ ਦੀ ਸਮਰੱਥਾ ਲਗਭਗ 10 ਲੱਖ ਬੈਰਲ ਕੱਚਾ ਤੇਲ ਪ੍ਰਤੀ ਦਿਨ ਹੋਵੇਗੀ। ਕੈਨੇਡਾ ਸਰਕਾਰ ਦਾ ਅਨੁਮਾਨ ਹੈ ਕਿ ਇਸ ਪ੍ਰਾਜੈਕਟ ਨਾਲ ਕਰੀਬ 1.40 ਲੱਖ ਨੌਕਰੀਆਂ ਪੈਦਾ ਹੋ ਸਕਦੀਆਂ ਹਨ ਅਤੇ ਹਰ ਸਾਲ 20 ਅਰਬ ਕੈਨੇਡੀਅਨ ਡਾਲਰ ਤੋਂ ਵੱਧ GDP ਵਿੱਚ ਯੋਗਦਾਨ ਪੈ ਸਕਦਾ ਹੈ। ਸਰਕਾਰ ਮੁਤਾਬਕ 2060 ਤੱਕ ਇਸ ਤੋਂ ਲਗਭਗ 100 ਅਰਬ ਕੈਨੇਡੀਅਨ ਡਾਲਰ ਸਰਕਾਰੀ ਆਮਦਨ ਵੀ ਪੈਦਾ ਹੋ ਸਕਦੀ ਹੈ।
ਕੈਨੇਡਾ ਇਸ ਸਮੇਂ ਆਪਣੇ ਕੱਚੇ ਤੇਲ ਦੇ 90 ਫੀਸਦੀ ਤੋਂ ਵੱਧ ਨਿਰਯਾਤ ਅਮਰੀਕਾ ਨੂੰ ਕਰਦਾ ਹੈ। ਪੱਛਮੀ ਤੱਟ ਤੱਕ ਨਵੀਂ ਪਾਈਪਲਾਈਨ ਬਣਨ ਨਾਲ ਕੈਨੇਡਾ ਨੂੰ ਏਸ਼ੀਆ ਸਮੇਤ ਹੋਰ ਅੰਤਰਰਾਸ਼ਟਰੀ ਬਾਜ਼ਾਰਾਂ ਤੱਕ ਤੇਲ ਪਹੁੰਚਾਉਣ ਦਾ ਮੌਕਾ ਮਿਲ ਸਕਦਾ ਹੈ। ਮੌਜੂਦਾ ਟ੍ਰਾਂਸ ਮਾਊਂਟੇਨ ਪਾਈਪਲਾਈਨ ਦੀ ਸਮਰੱਥਾ ਪਹਿਲਾਂ ਹੀ ਲਗਭਗ ਪੂਰੀ ਹੋ ਚੁੱਕੀ ਹੈ।
ਇਸ ਪ੍ਰਾਜੈਕਟ ਦੀ ਲਾਗਤ 35.2 ਤੋਂ 43.7 ਅਰਬ ਕੈਨੇਡੀਅਨ ਡਾਲਰ ਦੇ ਵਿਚਕਾਰ ਹੋਣ ਦਾ ਅਨੁਮਾਨ ਹੈ। ਇਸ ਨੂੰ ਸਰਕਾਰੀ ਮਾਲਕੀ ਵਾਲੀ Trans Mountain Corp ਵੱਲੋਂ Pembina Pipeline Corp ਨਾਲ ਮਿਲ ਕੇ ਬਣਾਇਆ ਜਾਣਾ ਹੈ। ਫੈਡਰਲ ਅਤੇ ਅਲਬਰਟਾ ਸਰਕਾਰਾਂ ਇਸ ਵਿੱਚ ਵੱਡੀ ਹਿੱਸੇਦਾਰੀ ਰੱਖਣਗੀਆਂ, ਜਦਕਿ Indigenous ਭਾਈਚਾਰਿਆਂ ਨੂੰ ਘੱਟੋ-ਘੱਟ 10 ਫੀਸਦੀ ਮਾਲਕੀ ਹਿੱਸਾ ਦੇਣ ਦੀ ਪੇਸ਼ਕਸ਼ ਕੀਤੀ ਗਈ ਹੈ।
ਹਾਲਾਂਕਿ, ਕੈਨੇਡਾ ਵਿੱਚ ਪਿਛਲੇ ਕਈ ਤੇਲ ਪਾਈਪਲਾਈਨ ਪ੍ਰਾਜੈਕਟਾਂ ਨੂੰ ਵਾਤਾਵਰਣਵਾਦੀ ਅਤੇ Indigenous ਸਮੂਹਾਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ ਹੈ। ਇਸ ਕਾਰਨ ਕੁਝ ਪ੍ਰਾਜੈਕਟ ਰੱਦ ਹੋਏ ਅਤੇ ਕੁਝ ਵਿੱਚ ਲਾਗਤ ਤੇ ਨਿਰਮਾਣ ਸਮੇਂ ਵਿੱਚ ਵਾਧਾ ਹੋਇਆ।
ਕਾਰਨੀ ਨੇ ਇਹ ਐਲਾਨ ਅਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨਾਲ ਫੋਰਟ ਮੈਕਮਰੇ ਵਿੱਚ ਕੀਤਾ। ਇਹ ਕਦਮ ਤੇਲ-ਸੰਪੰਨ ਅਲਬਰਟਾ ਨਾਲ ਫੈਡਰਲ ਸਰਕਾਰ ਦੇ ਸਬੰਧ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਵਜੋਂ ਵੀ ਦੇਖਿਆ ਜਾ ਰਿਹਾ ਹੈ, ਜਿੱਥੇ ਕੈਨੇਡਾ ਤੋਂ ਵੱਖ ਹੋਣ ਸਬੰਧੀ ਰੈਫਰੈਂਡਮ ਦੀ ਮੰਗ ਵੀ ਚਰਚਾ ਵਿੱਚ ਹੈ।