ਰਿਪੋਰਟਾਂ ਮੁਤਾਬਕ ਯੂਕਰੇਨ ਵੱਲੋਂ ਰੂਸ ਦੀਆਂ ਰਿਫਾਈਨਰੀਆਂ ਅਤੇ ਤੇਲ ਸਹੂਲਤਾਂ ’ਤੇ ਲਗਾਤਾਰ ਡਰੋਨ ਹਮਲਿਆਂ ਕਾਰਨ ਦੇਸ਼ ਦੀ ਘਰੇਲੂ ਰਿਫਾਈਨਿੰਗ ਸਮਰੱਥਾ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਇਸ ਕਾਰਨ ਪੈਦਾ ਹੋਏ ਗੰਭੀਰ ਇੰਧਨ ਸੰਕਟ ਵਿਚ ਰੂਸ ਨੇ ਐਮਰਜੈਂਸੀ ਪੈਟਰੋਲ ਲਈ ਭਾਰਤ ਦਾ ਰੁਖ ਕੀਤਾ ਹੈ।
ਭਾਰਤ ਤੋਂ ਘੱਟੋ-ਘੱਟ 67,000 ਟਨ ਪੈਟਰੋਲ ਰੂਸ ਭੇਜੇ ਜਾਣ ਦੀ ਗੱਲ ਸਾਹਮਣੇ ਆਈ ਹੈ। ਇਹ ਦੋਵਾਂ ਦੇਸ਼ਾਂ ਵਿਚਾਲੇ ਊਰਜਾ ਵਪਾਰ ਦੇ ਇਤਿਹਾਸ ਵਿੱਚ ਇੱਕ ਬੇਮਿਸਾਲ ਉਲਟਫੇਰ ਮੰਨਿਆ ਜਾ ਰਿਹਾ ਹੈ।
ਯੂਕਰੇਨੀ ਹਮਲਿਆਂ ਕਾਰਨ ਰੂਸ ਦੀ ਰਿਫਾਈਨਿੰਗ ਸਮਰੱਥਾ ਦਾ ਇੱਕ ਵੱਡਾ ਹਿੱਸਾ ਪ੍ਰਭਾਵਿਤ ਹੋਇਆ ਹੈ। ਰਿਪੋਰਟ ਮੁਤਾਬਕ ਰੂਸ ਦੀ ਲਗਭਗ 40 ਫੀਸਦੀ ਰਿਫਾਈਨਿੰਗ ਸਮਰੱਥਾ ਘੱਟੋ-ਘੱਟ ਦੋ ਮਹੀਨਿਆਂ ਤੱਕ ਮੁੜ ਚਾਲੂ ਨਾ ਹੋਣ ਦੀ ਸੰਭਾਵਨਾ ਹੈ।
ਰੂਸ ਦੀਆਂ ਫਿਊਲ ਸਹੂਲਤਾਂ ’ਤੇ ਹਮਲਿਆਂ ਦੀ ਲੜੀ ਕਾਰਨ ਦੇਸ਼ ਵਿੱਚ ਤੇਲ ਰਿਫਾਈਨਿੰਗ ਦੀ ਮਾਤਰਾ 21 ਸਾਲਾਂ ਤੋਂ ਵੱਧ ਸਮੇਂ ਦੇ ਸਭ ਤੋਂ ਹੇਠਲੇ ਪੱਧਰ ’ਤੇ ਪਹੁੰਚ ਗਈ ਹੈ। ਇਸ ਨਾਲ ਦੁਨੀਆ ਦੇ ਸਭ ਤੋਂ ਵੱਡੇ ਤੇਲ ਉਤਪਾਦਕ ਦੇਸ਼ਾਂ ਵਿੱਚੋਂ ਇੱਕ ਰੂਸ ਨੂੰ ਪਹਿਲੀ ਵਾਰ ਤਿਆਰ ਪੈਟਰੋਲ ਦੀ ਦਰਾਮਦ ਕਰਨ ਦੀ ਅਸਧਾਰਨ ਸਥਿਤੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਸਭ ਤੋਂ ਦਿਲਚਸਪ ਗੱਲ ਇਹ ਹੈ ਕਿ ਰੂਸ ਦਾ ਕੱਚਾ ਤੇਲ ਭਾਰਤ ਭੇਜਿਆ ਜਾ ਰਿਹਾ ਹੈ, ਭਾਰਤ ਵਿੱਚ ਇਸ ਨੂੰ ਰਿਫਾਈਨ ਕਰਕੇ ਪੈਟਰੋਲ ਬਣਾਇਆ ਜਾ ਰਿਹਾ ਹੈ ਅਤੇ ਫਿਰ ਉਹੀ ਤਿਆਰ ਇੰਧਨ ਰੂਸ ਵਾਪਸ ਭੇਜਿਆ ਜਾ ਰਿਹਾ ਹੈ।