ਅਮਰੀਕਾ ਦੇ ਕਾਰਜਕਾਰੀ ਅਟਾਰਨੀ ਜਨਰਲ ਟੌਡ ਬਲਾਂਚ ਨੇ ਸੈਨੇਟ ਜੂਡੀਸ਼ਰੀ ਕਮੇਟੀ ਸਾਹਮਣੇ ਆਪਣੀ ਪੁਸ਼ਟੀ ਸੁਣਵਾਈ ਦੌਰਾਨ ਕਿਹਾ ਕਿ ਜੇਕਰ ਉਨ੍ਹਾਂ ਨੂੰ ਸਥਾਈ ਅਟਾਰਨੀ ਜਨਰਲ ਬਣਾਇਆ ਗਿਆ ਤਾਂ ਉਹ ਸਿਰਫ਼ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਨਹੀਂ, ਸਗੋਂ ਪੂਰੇ ਅਮਰੀਕੀ ਲੋਕਾਂ ਦੇ ਹਿੱਤਾਂ ਦੀ ਰੱਖਿਆ ਕਰਨਗੇ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਟਰੰਪ ਦੇ ਨਿੱਜੀ ਵਕੀਲ ਵਜੋਂ ਕੀਤਾ ਗਿਆ ਕੰਮ ਉਨ੍ਹਾਂ ਦੇ ਲੰਮੇ ਕਾਨੂੰਨੀ ਕਰੀਅਰ ਦਾ ਸਿਰਫ਼ ਇੱਕ ਛੋਟਾ ਹਿੱਸਾ ਹੈ ਅਤੇ ਇਸ ਨਾਲ ਉਨ੍ਹਾਂ ਦੀ ਪਹਿਚਾਣ ਤੈਅ ਨਹੀਂ ਹੁੰਦੀ।
ਪੰਜ ਘੰਟਿਆਂ ਤੋਂ ਵੱਧ ਚੱਲੀ ਸੁਣਵਾਈ ਦੌਰਾਨ ਡੈਮੋਕ੍ਰੈਟਿਕ ਸੈਨੇਟਰਾਂ ਨੇ ਬਲਾਂਚ ‘ਤੇ ਦੋਸ਼ ਲਗਾਇਆ ਕਿ ਉਹ ਨਿਆਂ ਵਿਭਾਗ ਦੀ ਸੁਤੰਤਰਤਾ ਨੂੰ ਕਮਜ਼ੋਰ ਕਰਦੇ ਹੋਏ ਟਰੰਪ ਦੇ ਨਿੱਜੀ ਅਤੇ ਰਾਜਨੀਤਿਕ ਹਿੱਤਾਂ ਨੂੰ ਤਰਜੀਹ ਦੇ ਰਹੇ ਹਨ। ਖ਼ਾਸ ਕਰਕੇ ਆਈਆਰਐੱਸ (IRS) ਨਾਲ ਟਰੰਪ ਦੇ ਟੈਕਸ ਰਿਕਾਰਡ ਮਾਮਲੇ ਦੇ ਸਮਝੌਤੇ ਅਤੇ ਪ੍ਰਸਤਾਵਿਤ 1.8 ਅਰਬ ਡਾਲਰ ਦੇ “ਐਂਟੀ-ਵੇਪਨਾਈਜ਼ੇਸ਼ਨ ਫੰਡ” ਨੂੰ ਲੈ ਕੇ ਉਨ੍ਹਾਂ ਤੋਂ ਤਿੱਖੇ ਸਵਾਲ ਪੁੱਛੇ ਗਏ।
ਸੁਣਵਾਈ ਦੌਰਾਨ ਇੱਕ ਮੌਕੇ ‘ਤੇ ਬਲਾਂਚ ਨੇ ਅਣਜਾਣੇ ਵਿੱਚ ਕਿਹਾ, “ਮੈਂ ਉਨ੍ਹਾਂ ਦਾ ਵਕੀਲ ਹਾਂ,” ਪਰ ਤੁਰੰਤ ਆਪਣੀ ਗੱਲ ਠੀਕ ਕਰਦੇ ਹੋਏ ਕਿਹਾ, “ਮੈਂ ਉਨ੍ਹਾਂ ਦਾ ਵਕੀਲ ਸੀ।” ਇਸ ਗੱਲ ਨੂੰ ਡੈਮੋਕ੍ਰੈਟਿਕ ਮੈਂਬਰਾਂ ਨੇ ਨਿਸ਼ਾਨਾ ਬਣਾਇਆ ਅਤੇ ਦਾਅਵਾ ਕੀਤਾ ਕਿ ਬਲਾਂਚ ਅਜੇ ਵੀ ਟਰੰਪ ਦੇ ਪ੍ਰਭਾਵ ਹੇਠ ਕੰਮ ਕਰ ਰਹੇ ਹਨ। ਇਸ ਦੇ ਜਵਾਬ ਵਿੱਚ ਬਲਾਂਚ ਨੇ ਕਿਹਾ, “ਰਾਸ਼ਟਰਪਤੀ ਮੇਰੀ ਸਲਾਹ ‘ਤੇ ਭਰੋਸਾ ਕਰਦੇ ਹਨ, ਪਰ ਇਸ ਦਾ ਮਤਲਬ ਇਹ ਨਹੀਂ ਕਿ ਮੈਂ ਉਨ੍ਹਾਂ ਦਾ ‘ਯੈਸ ਮੈਨ’ ਹਾਂ।”
ਬਲਾਂਚ ਨੇ ਇਹ ਵੀ ਕਿਹਾ ਕਿ 6 ਜਨਵਰੀ 2021 ਨੂੰ ਕੈਪੀਟਲ ਹਿੱਲ ਹਿੰਸਾ ਵਿੱਚ ਪੁਲਿਸ ‘ਤੇ ਹਮਲਾ ਕਰਨ ਵਾਲਿਆਂ ਖ਼ਿਲਾਫ਼ ਕਾਰਵਾਈ ਸਹੀ ਸੀ ਅਤੇ ਉਹ ਜੱਜਾਂ ਨੂੰ ਸਿਰਫ਼ ਰਾਸ਼ਟਰਪਤੀ ਦੇ ਵਿਰੁੱਧ ਫੈਸਲੇ ਦੇਣ ਕਾਰਨ ਮਹਾਬਿਓਗ ਰਾਹੀਂ ਹਟਾਉਣ ਦੇ ਹੱਕ ਵਿੱਚ ਨਹੀਂ ਹਨ।
ਸੁਣਵਾਈ ਦੌਰਾਨ ਜੈਫ਼ਰੀ ਐਪਸਟਿਨ ਮਾਮਲੇ ਦੀਆਂ ਫਾਈਲਾਂ ਜਾਰੀ ਕਰਨ ਦੇ ਤਰੀਕੇ ਨੂੰ ਲੈ ਕੇ ਵੀ ਸਵਾਲ ਉੱਠੇ। ਬਲਾਂਚ ਨੇ ਮੰਨਿਆ ਕਿ ਕੁਝ ਗਲਤੀਆਂ ਹੋਈਆਂ, ਪਰ ਦਾਅਵਾ ਕੀਤਾ ਕਿ ਮੌਜੂਦਾ ਪ੍ਰਸ਼ਾਸਨ ਨੇ ਇਸ ਮਾਮਲੇ ਵਿੱਚ ਪਿਛਲੀਆਂ ਸਰਕਾਰਾਂ ਨਾਲੋਂ ਵੱਧ ਪਾਰਦਰਸ਼ਤਾ ਦਿਖਾਈ ਹੈ।
ਇਸ ਦੌਰਾਨ ਰਿਪਬਲਿਕਨ ਸੈਨੇਟਰ ਜੌਨ ਕਾਰਨਿਨ ਨੇ ਵੀ ਬਲਾਂਚ ਤੋਂ ਕਈ ਸਖ਼ਤ ਸਵਾਲ ਪੁੱਛੇ ਅਤੇ ਕਿਹਾ ਕਿ ਅਟਾਰਨੀ ਜਨਰਲ ਨੂੰ ਰਾਸ਼ਟਰਪਤੀ ਅਤੇ ਦੇਸ਼ ਦੇ ਮੁੱਖ ਕਾਨੂੰਨੀ ਅਧਿਕਾਰੀ ਵਿਚਕਾਰ ਸੰਤੁਲਨ ਬਣਾਈ ਰੱਖਣਾ ਪੈਂਦਾ ਹੈ। ਉਨ੍ਹਾਂ ਨੇ ਅਜੇ ਤੱਕ ਇਹ ਫੈਸਲਾ ਨਹੀਂ ਕੀਤਾ ਕਿ ਉਹ ਬਲਾਂਚ ਦੀ ਨਾਮਜ਼ਦਗੀ ਦੇ ਹੱਕ ਵਿੱਚ ਵੋਟ ਪਾਉਣਗੇ ਜਾਂ ਨਹੀਂ।
ਹੁਣ ਸੈਨੇਟ ਜੂਡੀਸ਼ਰੀ ਕਮੇਟੀ ਇਸ ਮਹੀਨੇ ਦੇ ਅੰਤ ਵਿੱਚ ਬਲਾਂਚ ਦੀ ਨਾਮਜ਼ਦਗੀ ‘ਤੇ ਵੋਟ ਕਰੇਗੀ। ਜੇਕਰ ਕਮੇਟੀ ਤੋਂ ਮਨਜ਼ੂਰੀ ਮਿਲ ਜਾਂਦੀ ਹੈ ਤਾਂ ਅਗਸਤ ਦੀ ਛੁੱਟੀ ਤੋਂ ਪਹਿਲਾਂ ਪੂਰੀ ਸੈਨੇਟ ਵਿੱਚ ਉਨ੍ਹਾਂ ਦੀ ਪੁਸ਼ਟੀ ਲਈ ਵੋਟਿੰਗ ਹੋਣ ਦੀ ਸੰਭਾਵਨਾ ਹੈ।