ਵਾਸ਼ਿੰਗਟਨ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵਾਸ਼ਿੰਗਟਨ ਡੀਸੀ ਨੂੰ ਅਪਰਾਧ ਮੁਕਤ ਕਰਨ ਦਾ ਪ੍ਰਣ ਲਿਆ ਹੋਇਆ ਹੈ। ਇਸ ਦਿਸ਼ਾ ਵਿੱਚ ਟਰੰਪ ਨੇ ਸਭ ਤੋਂ ਪਹਿਲਾਂ 800 ਤੋਂ ਵੱਧ ਨੈਸ਼ਨਲ ਗਾਰਡ ਸੈਨਿਕਾਂ ਨੂੰ ਤਾਇਨਾਤ ਕਰਕੇ ਰਾਜਧਾਨੀ ਦੀ ਕਮਾਨ ਆਪਣੇ ਹੱਥਾਂ ਵਿੱਚ ਲੈ ਲਈ ਹੈ ਅਤੇ ਹੁਣ ਵਾਈਟ ਹਾਊਸ ਨੇ ਵਾਸ਼ਿੰਗਟਨ ਡੀਸੀ ਵਿੱਚ ਬੇਘਰ ਲੋਕਾਂ ਲਈ ਸੜਕਾਂ ਖਾਲੀ ਕਰਨ ਦਾ ਹੁਕਮ ਵੀ ਜਾਰੀ ਕਰ ਦਿੱਤਾ ਹੈ। ਵਾਈਟ ਹਾਊਸ ਨੇ ਮੰਗਲਵਾਰ ਨੂੰ ਨੋਟਿਸ ਜਾਰੀ ਕਰਕੇ ਕਿਹਾ ਹੈ ਕਿ ਸੜਕ ਤੇ ਰਹਿਣ ਵਾਲੇ ਲੋਕ ਜੇਕਰ ਸ਼ੈਲਟਰ ਹੋਮਜ਼ ਨਹੀਂ ਜਾਂਦੇ ਤਾਂ ਉਹਨਾਂ ਨੂੰ ਜੇਲ ਵਿੱਚ ਬੰਦ ਕਰ ਦਿੱਤਾ ਜਾਵੇਗਾ।
ਵਾਈਟ ਹਾਊਸ ਦੀ ਬੁਲਾਰਾ ਕੈਰੋਲੀਨ ਲੇਵਿਟ ਨੇ ਜਾਣਕਾਰੀ ਦਿੰਦੇ ਹੋਏ ਕਿਹਾ ਹੈ ਕਿ ਬੇਘਰ ਲੋਕਾਂ ਕੋਲ ਇੱਕ ਵਿਕਲਪ ਹੈ ਉਹ ਸ਼ੈਲਟਰ ਹੋਮਜ਼ ਵਿੱਚ ਜਾ ਸਕਦੇ ਹਨ। ਉੱਥੇ ਉਹਨਾਂ ਨੂੰ ਮਾਨਸਿਕ ਸਿਹਤ ਸਮੇਤ ਸਾਰੀਆਂ ਸਹੂਲਤਾਂ ਮੁੱਹਈਆ ਕਰਵਾਈਆਂ ਜਾਣਗੀਆਂ ਪਰ ਜੇਕਰ ਉਹਨਾਂ ਨੇ ਸ਼ੈਲਟਰ ਹੋਮਜ਼ ਵਿੱਚ ਪਨਾਹ ਲੈਣ ਤੋਂ ਇਨਕਾਰ ਕੀਤਾ ਤਾਂ ਉਹਨ੍ਹਾਂ ਤੇ ਜੁਰਮਾਨਾ ਲਗਾਇਆ ਜਾਵੇਗਾ ਅਤੇ ਜੇਲ ਵਿੱਚ ਬੰਦ ਕਰ ਦਿੱਤਾ ਜਾਵੇਗਾ। ਲੇਵਿਟ ਅਨੁਸਾਰ ਬੇਘਰ ਲੋਕਾਂ ਲਈ ਵਾਸ਼ਿੰਗਟਨ ਡੀਸੀ ਤੋਂ ਦੂਰ ਸ਼ੈਲਟਰ ਹੋਮਜ਼ ਬਣਾਏ ਜਾਣਗੇ। ਅਮਰੀਕੀ ਪੁਲਿਸ ਪਹਿਲਾਂ ਹੀ 70 ਲੋਕਾਂ ਨੂੰ ਪਾਰਕਾਂ ਤੋਂ ਬਾਹਰ ਕੱਢ ਚੁੱਕੀ ਹੈ। ਬਾਕੀ ਲੋਕਾਂ ਨੂੰ ਇਸ ਹਫਤੇ ਦੇ ਆਖਿਰ ਤੱਕ ਸ਼ੈਲਟਰ ਹੋਮਜ਼ ਵਿੱਚ ਭੇਜਣ ਦੀ ਕਾਰਵਾਈ ਜਾਰੀ ਹੈ
ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸੋਸ਼ਲ ਮੀਡੀਆ ‘ਤੇ ਚੇਤਾਵਨੀ ਦਿੰਦੇ ਹੋਏ ਕਿਹਾ ਸੀ ਕਿ ਉਹਨ੍ਹਾਂ ਦੇ ਕੋਈ ਸਖਤ ਕਦਮ ਚੁੱਕਣ ਤੋਂ ਪਹਿਲਾਂ ਬੇਘਰ ਲੋਕਾਂ ਨੂੰ ਵਾਸ਼ਿੰਗਟਨ ਡੀਸੀ ਛੱਡ ਕੇ ਚਲੇ ਜਾਣਾ ਚਾਹੀਦਾ ਹੈ। ਟਰੰਪ ਅਨੁਸਾਰ ਬੇਘਰ ਲੋਕਾਂ ਨੇ ਵਾਸ਼ਿੰਗਟਨ ਤੇ ਕਬਜ਼ਾ ਕਰ ਲਿਆ ਹੈ ਅਤੇ ਵਾਸ਼ਿੰਗਟਨ ਵਿੱਚ ਵੱਧ ਰਹੇ ਅਪਰਾਧਾਂ ਵਿੱਚ ਉਹਨਾਂ ਦਾ ਹੱਥ ਹੈ ! ਯੂਐਸ ਫੈਕਟਸ ਵੈਬਸਾਈਟ ਅਨੁਸਾਰ ਵਾਸ਼ਿੰਗਟਨ ਦੀ ਕੁੱਲ ਆਬਾਦੀ 7 ਲੱਖ ਦੇ ਕਰੀਬ ਹੈ। ਬੇਘਰ ਲੋਕਾਂ ਦੀ ਸੂਚੀ ਵਿੱਚ ਵਾਸ਼ਿੰਗਟਨ 16ਵੇਂ ਨੰਬਰ ‘ਤੇ ਹੈ ! ਸਭ ਤੋਂ ਵੱਧ ਬੇਘਰ ਲੋਕ ਨਿਊਯਾਰਕ ,ਲਾਸ ਏੰਜਲਸ ,ਸ਼ਿਕਾਗੋ ,ਸਿਆਟਲ ਅਤੇ ਡੇਨਵਰ ਵਿੱਚ ਹਨ !
#saddatvusa#america#washingtondc#homelesspeople#ShelterHomes#NewsUpdate#usanews#DonaldTrump